Американците соборуваат ирански дронови над Бахреин, 11-годишно девојче е повредено

Единаесетгодишно девојче се здобило со полесни повреди за време на иранските воздушни напади врз Бахреин, соопшти Министерството за внатрешни работи на оваа заливска држава.

— реклама —

Според официјалното соопштение, девојчето било повредено во нападите врз Хамад Сити и главниот град Манама. Властите наведуваат дека повредите и материјалната штета настанале од остатоци од беспилотни летала, откако системите за противвоздушна одбрана ги пресретнале и собориле дроновите.

Министерството објави и фотографии од последиците, на кои се гледаат оштетувања на станбени објекти предизвикани од паднатите делови од леталата.

— реклама —

Најновата ескалација на Блискиот Исток започна откако американската војска изврши нов бран воздушни напади врз воени цели низ Иран, вклучително и локации во покраината Алборз и радарски системи во близина на Хормускиот Теснец.

— реклама —

Вашингтон соопшти дека нападите биле одговор на претходното соборување на американски јуришен хеликоптер „Апачи“, но и обид да се изврши притисок врз Техеран за прифаќање мировен договор.

Иран возврати со масовни контранапади, лансирајќи балистички ракети и беспилотни летала кон 18 воени цели и воздухопловни бази на Арапскиот Полуостров што ги користат американските сили.

Главни цели на иранската одмазда биле воздухопловната база Ал-Азрак во Јордан, како и американските воени позиции во Кувајт и Бахреин, каде што се наоѓа седиштето на Петтата флота на американската морнарица. Поради нападите беа активирани системите за противвоздушна одбрана „Патриот“, а привремено беа воведени и ограничувања во воздушниот сообраќај во регионот.