Американците спасиле член од екипаж на F-15 над Иран по 24 часа потрага

Американските специјални сили спасиле втор член од екипажот на соборен борбен авион F-15 над Иран, потврдија американски официјални лица за медиумите.

Станува збор за офицер за вооружување кој, по катапултирањето, бил повреден, но успеал да се движи и повеќе од 24 часа да избегнува заробување во планински предел во југозападен Иран.

— реклама —

Операцијата се одвивала во трка со Исламска револуционерна гарда, чии сили исто така трагаа по исчезнатиот член од екипажот.

Според информациите, двата члена на екипажот биле спасени во одвоени операции. Пилотот бил извлечен неколку часа по уривањето, додека вториот бил пронајден дури по повеќечасовна потрага.

— реклама —

Во спасувачката акција учествувале елитни единици, вклучително и припадници на Navy SEALs, со силна воздушна поддршка и интензивна огнена заштита за извлекување од теренот.

— реклама —

Клучна улога имала и CIA, која спровела операција на дезинформации, пласирајќи податоци дека пилотот веќе е пронајден, со цел да ги оттурне иранските сили од вистинската локација.

По лоцирањето, информациите биле споделени со Пентагон и Белата куќа, по што Доналд Трамп издал наредба за итна спасувачка операција.

— реклама —

Во меѓувреме, американските сили извршиле напади врз ирански позиции за да спречат приближување до зоната на извлекување.

Инцидентот дополнително ја засилува ескалацијата меѓу САД и Иран, особено по информациите дека покрај овој авион бил соборен и јуришен авион А-10, како и погоден хеликоптер Black Hawk. И покрај тоа, Трамп изјави дека успешното спасување без жртви покажува дека САД има „целосна воздушна надмоќ“.