Американката која го преживеа погубувањето со смртоносна инјекција: „Ниту еден момент не помина без болка“

Американката Криста Пајк (50), осудена на смрт поради бруталното убиство на Колин Слемер (19), изјави дека веќе еден месец се соочува со сериозни физички и психички последици, откако на 30 септември го преживеала неуспешното погубување со смртоносна инјекција во американската сојузна држава Тенеси.

Во изјавата објавена од нејзините адвокати, Пајк опишала дека се разбудила во болница, збунета и со силни болки, пренесува BBC.

„Ниту еден момент од таа ноќ не помина без да чувствувам болка. Ме болат телото, рацете и грлото. Сè уште тешко зборувам, а болката не е само физичка. Чувствувам болка и во умот и во душата“, нагласила Пајк.

— реклама —

Пајк, да потсетиме, преживеала две дози пентобарбитал, лек кој се користи при извршување на смртните казни. По неуспешното погубување била пренесена во болница во критична состојба.

Пајк во својата изјава опишала дека во просторијата за погубување влегла убедена дека ќе умре и дека се обидела да го прифати она што ја очекува.

Наместо тоа, неколку дена подоцна се разбудила во болница, без да знае каде се наоѓа и што се случило.

— реклама —

„Пред погубувањето не го замислував животот по 30 септември, бидејќи верував дека нема да го има“, рекла Пајк.

Особено тешко ѝ паднало тоа што, како што наведува, поради пропустите при извршувањето на казната останала тешко повредена, додека нејзината иднина е целосно неизвесна.

Таа им се заблагодарила на медицинскиот персонал кој ѝ го спасил животот, како и на адвокатите и на луѓето кои ѝ пружиле поддршка.

— реклама —

Порача и дека размислува за семејството на својата жртва и за страдањето што им го предизвикало убиството на Слемер.

„Не знам зошто преживеав. Не знам што следува, иако се обидувам да закрепнувам ден по ден“, заклучила Пајк.

Пајк е осудена на смрт поради убиството на Слемер, кое се случило во јануари 1995 година во Тенеси. Слемер била ученичка во програма за стручно оспособување во која учествувала и Пајк.

Според наводите од судската постапка, Пајк и нејзиното тогашно момче, заедно со уште еден млад човек, ја намамиле Слемер во шума, каде што била брутално претепана и убиена.

На нејзиното тело биле пронајдени бројни повреди, а дел од черепот, според доказите изнесени во судската постапка, бил отстранет и задржан како трофеј.

Пајк во времето на злосторството имала 18 години. Во тоа време станала најмладата жена осудена на смрт во Соединетите Американски Држави.