Криста Пајк ја преживеа егзекуцијата, мајката на жртвата: „Губам надеж дека ќе ја погубат“

Меј Мартинез, мајката на убиената Колин Слемир, изјавила дека имала чувство оти Криста Пајк нема да почине за време на неуспешниот обид за нејзино погубување.

Криста Пајк, осудена на смрт поради убиството на 19-годишната Колин Слемир, го преживеала неуспешниот обид за егзекуција во Тенеси. Нејзините адвокати сега соопштуваат дека таа е свесна и зборува, додека мајката на нејзината жртва вели дека очекувала Пајк да преживее, пишува „Ројтерс“.

Криста Пајк (50) требало да стане првата жена погубена во американската сојузна држава Тенеси по повеќе од 200 години. Сепак, обидот за извршување на смртната казна со смртоносна инјекција не успеал, а Пајк, и покрај примените дози од лекот, останала жива.

Нејзините адвокати во вторникот соопштиле дека таа е свесна и зборува, речиси една недела по неуспешното погубување.

— реклама —

„И покрај сите очекувања, Криста Пајк е свесна, зборува и продолжува да добива интензивна медицинска нега“, навеле нејзините адвокати.

Тие додале дека таа претрпела тешки повреди на рацете и дека сè уште е врзана со лисици и прицврстена за болничкиот кревет.

„Нејзиното опоравување е медицински без преседан. Прогнозата и понатаму е неизвесна, но во најмала рака очекуваме долго опоравување“, соопштиле адвокатите.

Мајката на убиената Колин Слемир, Меј Мартинез, за WBIR рекла дека имала чувство оти Пајк нема да почине за време на обидот за егзекуција.

Мартинез сега, како што наведува, сè помалку верува дека државата ќе успее да ја изврши смртната казна над Пајк.

— реклама —

На прашањето што би сакала да се случи доколку државата повторно се обиде да ја погуби, таа одговорила:

„Не е важно што мислам јас, тие ќе го направат она што ќе го направат.“

Пајк се смета за првата личност во САД која преживеала обид за егзекуција откако веќе ѝ биле вбризгани лекови наменети за извршување на смртната казна.

Според нејзиниот правен тим, Пајк за време на обидот за погубување добила две дози пентобарбитал, при што биле направени најмалку седум обиди за поставување игла. Една од иглите излегла од нејзината рака свиткана под агол од 90 степени.

— реклама —

Потоа, во критична состојба, била префрлена од затворот „Ривербенд Максимум Секјурити Институтион“ во Нешвил во болница, каде што била приклучена на респиратор.

Според информациите од нејзините адвокати, таа сега е свесна и зборува, но и понатаму ѝ е потребна интензивна медицинска нега.

Неуспешниот обид за погубување го отвори и прашањето дали државата воопшто би можела повторно да се обиде да ја изврши смртната казна.

Правната експертка Дебора Дено од Правниот факултет на Универзитетот „Фордхам“ предупредила дека лице не може да биде погубено доколку поради повреда на мозокот не е способно да ја разбере постапката и казната што му претстои.

„Не може да биде погубена ако претрпела оштетување на мозокот и не ја разбира постапката“, рекла Дено.

— реклама —

Таа потсетила на одлуката на Врховниот суд на САД од 2019 година, според која лице кое не е свесно за казната што му претстои не може да биде погубено.

Адвокатите на Пајк побарале од гувернерот на Тенеси, Бил Ли, да ѝ ја преиначи смртната казна, тврдејќи дека таа „претрпела казна поголема од која било друга личност во историјата на американската смртна казна“.

Во петокот поднеле барање до судот Одделот за затвори на Тенеси да ги заштити и зачува сите докази поврзани со обидот за погубување.

По инцидентот, гувернерот Бил Ли ги суспендирал сите преостанати погубувања во Тенеси до крајот на годината и наредил независна истрага за причините за неуспехот. Во меѓувреме, шефот на затворскиот систем на Тенеси, Френк Страда, најавил оставка.