Американскиот конгресмен Џо Вилсон загрижен поради можни насилства на изборите во Србија

Американскиот конгресмен Џо Вилсон изрази загриженост поради извештаите дека властите во Србија можеби подготвуваат насилство врз граѓаните со цел да го попречат изборниот процес.

— реклама —

Во објава на социјалната мрежа Икс, тој навел дека е особено загрижен поради големиот број граѓани што излегуваат на гласање и повикал изборниот ден да помине мирно.

„Додека граѓаните на Србија излегуваат на избирачките места во историски голем број, длабоко сум загрижен поради извештаите дека властите можеби се подготвуваат да употребат насилство против граѓаните за да го попречат изборниот процес. Таквите напади се целосно неприфатливи. Ја повикувам Србија да остане мирна“, напишал Вилсон.

— реклама —

— реклама —

Американскиот конгресмен и претходно ја критикувал власта на Александар Вучиќ поради состојбата со демократијата, изборните услови и наводите за шпионирање студенти и активисти. Во изминатите недели повеќепати предупредувал и на можни нерегуларности во изборниот процес.

Во почетокот на септември оценил дека постојат сериозни индиции оти изборите нема да бидат слободни и фер, а во други објави ја критикувал власта поради наводна употреба на шпионски софтвер за надзор на граѓаните.

Во текст објавен на почетокот на октомври во американскиот медиум „Вашингтон егзаминер“, Вилсон ги опишал изборите на 25 октомври како едни од најважните во поновата историја на Србија и ја повикал меѓународната заедница внимателно да го следи изборниот процес.