Американскиот министер за одбрана Пит Хегсет упати остро предупредување до Куба за време на посетата на американската воена база во Заливот Гвантанамо, порачувајќи дека Хавана не треба да набавува оружје што би можело да ја загрози базата или американската територија.
„Би било неразумно кубанската влада да се обиде да набави или да дојде во посед на оружје со кое би можела да ја погоди оваа база или американско тло“, изјави Хегсет, без да прецизира за какво оружје станува збор.
Тој предупреди дека таков потег би можел да предизвика конфликт.
„Со тоа би предизвикале судир што не само што не го посакуваат, туку не би можеле ниту да го издржат“, рече американскиот министер, додавајќи дека „ниедна земја во светот не може да се мери со способностите на САД“.
Изјавите доаѓаат во период на зголемени тензии меѓу Вашингтон и Хавана. Американската база во Гвантанамо се наоѓа на југот на Куба и претставува единствена американска воена база на територијата на друга држава што се користи врз основа на долгорочен закуп и покрај противењето на кубанските власти.
Минатиот месец американскиот портал „Аксиос“, повикувајќи се на доверливи разузнавачки документи, објави дека Куба набавува стотици ударни дронови од Русија и Иран. Кубанските власти ги отфрлија овие тврдења, оценувајќи ги како клевети и дезинформации.
Кубанскиот министер за надворешни работи Бруно Родригез изјави дека Куба има право на легитимна самоодбрана, додека претседателот Мигел Дијаз-Канел порача дека неговата земја нема агресивни намери, но предупреди дека евентуална американска агресија би можела да предизвика „крвопролевање со несогледливи последици за регионалниот мир и стабилност“.
