Повеќе од 15 пожари на отворен простор се активни во земјава, а два од нив во текот на денот директно ги загрозиле населените места, информира директорот на Центарот за управување со кризи, Стојанче Ангелов.
Како еден од најсериозните пожари го посочи огнот што избувна во близина на селата Баница и Водоча, непосредно до Струмица. Пожарот стигнал на само неколку метри од првите куќи во Струмица, но брзата интервенција на струмичките пожарникари, со поддршка од екипите од Валандово и Радовиш, спречила огнот да предизвика поголема опасност.
Ангелов посочи дека на терен бил и градоначалникот на Струмица, кој со расположливата механизација помогнал во создавањето противпожарни пресеци. Во гаснењето учествувала и механизација од Дирекцијата за заштита и спасување.
Пожарот кај Струмица, сепак, и натаму е активен во полето, а Ангелов изрази надеж дека нема да се прошири кон околните села.
Како втор сериозен пожар го посочи оној на територијата на Општина Прилеп, во близина на гробиштата, кој во одреден момент ја загрозил викенд-населбата. Според Ангелов, пожарот сега е ставен под целосна контрола. Во неговото гаснење учествувале прилепските пожарникари, со поддршка од тимови од Битола и Кавадарци, како и две возила „Пинцгауер“ на Дирекцијата за заштита и спасување.
Активен пожар има и на територијата на Општина Желино, во планинскиот дел спроти Карпала. Огнот може да загрози неколку викендички и земјоделски површини, а на терен се тетовските пожарникари.
Ангелов информираше и за пожарот во Општина Маврово и Ростуше, кој е активен од вчера, како и за пожарот над Драчево, во близина на бензинската пумпа, каде што интервенира Скопската бригада.
Повторно се активирал и пожарот над Китка, кој, според Ангелов, може да се прошири кон некои од блиските планински села. Пожари има и на други локации низ државата.
Високите температури, кои се приближуваат до 40 степени, како и засилениот ветер што го менува правецот, дополнително го отежнуваат гаснењето на пожарите, предупреди Ангелов.
Тој упати апел до граѓаните да бидат исклучително внимателни и да не предизвикуваат пожари на отворен простор.
„Доволно е искра за вистинска катастрофа“, порача Ангелов.
