Анушиќ до Вучиќ: „Знаеме каде беше во 90-тите, неговата реторика кон Хрватска станува навредлива“

Хрватскиот министер за одбрана Иван Анушиќ го критикуваше српскиот претседател Александар Вучиќ по неговите реакции на изјавите на хрватскиот премиер Андреј Пленковиќ.

Анушиќ порача дека во Хрватска добро се знаат политичкото минато на Вучиќ и неговата реторика од 1990-тите, оценувајќи дека неговите сегашни пораки кон Хрватска стануваат навредливи.

— реклама —

„Ние ја знаеме историјата и претседателот на Србија, знаеме каде беше во 90-тите години и ја знаеме реториката од тие години. Сега ја слушаме сегашната реторика, која веќе е малку и навредлива“, изјави Анушиќ.

— реклама —

Тој рече дека разбира политички критики, како и заострување на реториката за време на избори, но смета дека односот на Вучиќ кон Хрватска ги надминал тие рамки.

„Разбирам дека некој во одреден момент може нешто да каже и да критикува или тоа во тој момент да му биде политички корисно поради изборите. Но, континуирано да ја напаѓате Хрватска, да ја навредувате Хрватска и хрватскиот народ е нешто што стана вообичаено од страна на Вучиќ и неговиот режим“, рече Анушиќ.

— реклама —

Пленковиќ претходно изјави дека Хрватска внимателно го следи, како што го опиша, „неверојатниот процес на вооружување на Србија“, кој според него наликува на „шопинг-манија“. Тој нагласи дека Хрватска ги развива своите вооружени сили исклучиво како средство за одвраќање.

Вучиќ одговори дека Србија има „производствена манија“ и „шопинг-манија“, но нема „нациманија“. Тој истовремено зборуваше и за, како што тврдеше, зајакнување на нацизмот во Хрватска и рече дека Србија внимателно го следи тој процес.

Вучиќ истакна дека, според него, во Хрватска се присутни нацистичка идеологија и симболи поврзани со Втората светска војна.