НАТО ја одби Приштина
Соединетите Држави ги „поздравуваат аспирациите на Приштина за членство на Косово во НАТО, но процедурата за членство е сложена и бара долгорочен и внимателен пристап“, изјави за Радио Слободна Европа на албански неименуван портпарол на Стејт департментот.
„Косово најдобро може да ја покаже својата подготвеност за одговорностите на членството во НАТО, продолжувајќи со активното спроведување на десетгодишниот транзициски план на Косовските безбедносни сили и не отстапувајќи од него“, рече портпаролот.
„Изложени сме на постојаните напори на Русија да го поткопа Косово и да го дестабилизира целиот Западен Балкан“, вели Османи во писмото до Бајден.
Портпаролот на Стејт департментот додаде дека САД се посветени „да му помогнат на Косово да го обезбеди местото што го заслужува покрај соседите во европските и евроатлантските институции“.
„Продолжуваме да ги поддржуваме Косовските безбедносни сили додека не постигнат значителен напредок во нивниот десетгодишен транзициски план, развиен со поддршка од САД, со цел изградба на мултиетнички одбранбени сили кои не само што ќе можат да го заштитат територијалниот интегритет на Косово, туку и да придонесат за глобалните безбедносни напори надвор од нејзините граници“, рече портпаролот.
Косовските безбедносни сили се во процес на трансформација во полноправна армија од 2018 година. Процесот се очекува да трае десет години.
За време на трансформацијата, се очекува КБС да ја удвои својата сила и да стане професионална армија од 5.000 припадници.
