(ВИДЕО) Македонија во една сторија: 11 годишната Теа со страшни болки и целосна неподвижност 3 месеци чека да се набави соодветен лек
Тешко, со болки, со плачење.
Вака со месеци живее семејството Јованови чија 11 годишна ќерка Теа боледува од ретка болест..Вкочанетите раце и нозе поради дијагнозата се најголемиот хендикеп за ова девојче која и покрај силните болки и оставена без терапија, успева да измами и насмевка. Од март наваму е зависна од инвалидска количка поради прогресијата на болеста.
-Не може сама, има болки, плаче…Нема поголема болка за една мајка од оваа, вели Наска Јованова.
Кога пред три години и откриле на Теа дека има јувенилен ревматоиден артритис таа била на нога и на почетокот терапијата била соодветна. Лекарите им кажале – болеста е тешка и мора да се борите.
-Не знаев што е тоа но подоцна дознав каква болест е таа, дека ги вкочанува рацете и нозете, вели Теа Јованова.
Подоцна состојбата на Теа се влошила а дополнителен проблем е и пандемијата каде поради немање на термини морале да одат и во приватни болници.
-Сопругот зема кредит и така плаќавме, со една плата сме само, вели Јованова.
Ретката болест ја оставила Теа една година надвор од училишните клупи а неможе често да ги гледа и децата на улица бидејќи живеат во зграда на 4ти кат без лифт.
-Сакам да имам терапија. Сакам да си играм со децата како и порано, вели Теа.
Неможејќи да го издржи плачењето на ќерката, Наска била во Министерството за здравство, но не ја примиле. Од Клиниката за детски болести каде Теа е пациент ни одговорија дека е најден алтернативен лек кој девојчето ќе го прима додека стигне биолошката терапија. Целиот проблем е незавршениот тендер што го прави МЗ и долгите бирократски процедури кои се причина за солзите не само кај Теа туку и други пациенти со ретки болести.
Извор: Сител
