Рамноправност на македонските Бугари заедно со другите народи, а не малцинство, вели Радев
„Навистина напредуваме, промената на Уставот за РС Македонија е веќе прифатено да се случи и треба првин да се смени Уставот, па дури потоа да почнат преговорите со ЕУ“. Ова е пораката на бугарскиот претседател Румен Радев испратена од Латвија.
„Билатералните прашања треба да се иницираат на ниво на ЕУ во преговарачката рамка. Ова не е само билатерален спор за историјата, тоа се прашања што се однесуваат на темелите на ЕУ и по многу состаноци и убедувања, европските партнери, конечно, сфатија дека пристапот за решавање на овие прашања е во европските рамки. Рамноправност на македонските Бугари заедно со другите народи, а не малцинство, никогаш не сме зборувале за малцинство“, вели Радев, пренесе агенцијата „Бгнес“.
Бугарскиот претседател смета дека владата и Народното собрание треба да решат дали билатералниот протокол со Скопје доволно го брани бугарскиот интерес. Вели дека сегашниот пристап кон прашањето води кон блокирање и неможност да се донесе одлука за Македонија.
„Едно е јасно, во моментот нема време да се укине ветото, нема шанси тоа да се случи сега“, дециден е Радев.
