Крај на потрагата по преживеани во Авганистан, уништени 10.000 куќи
Властите во Авганистан денеска ја прекинаа потрагата по преживеани по земјотресот, во кој загинаа повеќе од 1.000 луѓе, изјави талибански претставник.
Околу 10.000 куќи беа делумно или целосно уништени во земјотресот во средата во југоисточниот дел на земјата на границата со Пакистан, изјави за Ројтерс Мохамед Насим Хакани, портпарол на Министерството за управување со катастрофи.
Талибанците апелираа до меѓународната заедница да испрати помош во Авганистан по разорниот земјотрес со јачина од 6,1 степени според Рихтер, во кој загинаа повеќе од 1.000 луѓе, а најмалку 1.500 беа повредени.
Не е познат бројот на затрупаните во урнатините, па се стравува дека конечниот број на жртви би можел да биде многу поголем, јави Би-Би-Си.
Земјотресот ја погоди југоисточната провинција Пактика, а Обединетите нации се обидуваат да обезбедат итно засолниште и помош во храна за сите.
