Ќе се повлече ли италијанскиот премиер од функцијата
Италијанскиот премиер Марио Драги изјави дека ќе се повлече од функцијата доколку Движењето 5 ѕвезди се повлече од неговата коалиција.
Тој ги повика и партиите кои го поддржуваат да престанат да поставуваат „ултиматуми“ на неговата влада.
Лидерот на Движењето 5 ѕвезди, поранешниот премиер Џузепе Конте минатата недела поднесе список со политички барања за континуирана поддршка за владата и се закани дека ќе ја прекине поддршката доколку Драги не преземе низа мерки, пренесува Ројтерс.
Клучното гласање за доверба во стимулативниот пакет за помош на семејствата и бизнисите да се справат со енергетската криза ќе се одржи оваа недела во Сенатот, но сè уште не е јасно дали Движењето 5 ѕвезди ќе учествува во гласањето или ќе ја напушти коалицијата. Сакајќи да ги намали тензиите, а по средбата со синдикатите, Драги рече дека многу политички приоритети на Движењето 5 ѕвезди се поклопуваат со владините, но предупреди на постојаните барања на коалициските партнери.
„Владата не работи со ултиматуми, со нив ја губи смислата на своето постоење“, рече Драги на прес-конференцијата, додавајќи дека нема да биде подготвен да остане премиер доколку Движењето 5 ѕвезди се повлече од кабинетот. Лидерот на Десната лига, Матео Салвини, чија партија е најголема во коалицијата на Драги, во јуни изјави дека во септември ќе одлучи дали ќе остане во владата или не.
