Во Австрија, несогласувања за карантинот за лицата заразени со коронавирус
Иако не е постигнат договор со покраините, министерот за здравство на Австрија има намера да донесе одлука за укинување на карантинот за лицата заразени со коронавирус.
На самитот со гувернерите на покраините не беше постигнат договор, бидејќи гувернерите од редовите на Социјалдемократската партија на Австрија (СПО), меѓу кои и градоначалникот на Виена, Михаел Лудвиг, се спротивставија на укинувањето на карантинот.
Лудвиг на прес-конференцијата по самитот рече дека е против укинување на карантинот.
„Намерата на австриската влада ја сметам за чекор во погрешна насока. Мораме да се подготвиме за есенскиот бран, бидејќи бројот на заразени нема да се намали. Претпоставуваме дека ќе имаме дополнителни бранови наесен“, рече тој.
Досега, Виена спроведуваше порестриктивна политика за корона од остатокот на земјата, така што карантинот трае 10 дена во главниот град, а пет дена во другите провинции.
Лудвиг, пак, рече дека виенските власти ќе ја забележат одлуката на федералните власти, бидејќи секој ден околу 300.000 луѓе од странство доаѓаат на работа во овој град, па затоа е невозможно да се примени поинаква мерка во однос на карантинот.
Предлог-уредбата за укинување на карантинот предвидува дека од 1 август на заразените ќе им биде дозволено да се движат, па дури и да одат на работа, но со обврска за носење маска и забрана за приближување до одредени места, како болници, установи за нега, градинки, основни училишта и слично.
