Првата бивалентна вакцина на „Модерна“ против ковид одобрена во Велика Британија
Првата бивалентна засилувачка вакцина на „Модерна“ против коронавирусот е одобрена за употреба во Велика Британија, објави денеска британската Регулаторна агенција за лекови и здравствени производи.
Таа приспособена вакцина, се вели, таргетира две варијанти на коронавирусот – оригиналниот вирус од 2020 година и варијантата омикрон.
Бивалентната вакцина на „Модерна“ е одобрена за бустер дози за возрасни бидејќи беше откриено дека ги исполнува стандардите на британскиот регулатор за безбедност, квалитет и ефикасност, се нагласува во соопштението објавено на веб-страницата на британската влада.
Одлуката за одобрување на бустер-вакцината во Обединетото Кралство ја поддржа владиното независно стручно научно советодавно тело – Комисијата за хумани лекови, по внимателно разгледување на доказите.
Одлуката на МХРА се заснова на податоци од клиничко испитување, кое покажа дека засилувачот на бивалентна вакцина на „Модерна“ предизвика силен имунолошки одговор на двата вида, а истражувачката анализа исто така покажа дека бивалентната вакцина предизвикува добар имунолошки одговор против омикронските подваријанти BA.4 и BA.5, се наведува во образложението на решението.
„Безбедносниот надзор покажа дека забележаните несакани ефекти се исти како оние забележани со оригиналната доза на ‘Модерна’ и обично се благи и се решаваат самостојно и не се идентификувани сериозни безбедносни грижи.
„Имаме сеопфатна стратегија за безбедносен надзор за следење на безбедноста на сите вакцини против Ковид-19 одобрени во Обединетото Кралство и ова ќе ја вклучи вакцината одобрена денес“, рече во писмената изјава извршниот директор на МХРА, Џун Рејн, пренесе „Денес.рс“.
