Русија: 10.000 граѓани доброволно се пријавија да се борат во Украина
Руската војска во четвртокот соопшти дека најмалку 10.000 луѓе доброволно се пријавиле да се борат во Украина. И тоа за само околу 24 часа откако претседателот Владимир Путин нареди мобилизација на резервистите.
„Во текот на првиот ден од делумната мобилизација, околу 10.000 граѓани доброволно пристигнаа во канцелариите за регрутирање без да чекаат покана“, изјави Владимир Цимљански, воен портпарол за руската новинска агенција Интерфакс.
Тој додаде дека армијата формирала центар за повици за да одговара на прашања од поединци и организации за мобилизација.
Аматерски снимки беа објавени на социјалните мрежи кои покажуваат стотици руски граѓани низ целата земја како одговараат на воените повици.
Во сибирскиот град Јакутија, снимката покажува мажи со скриени лица како ги гушкаат членовите на семејството – некои во солзи – пред да се качат во автобус.
Популарниот канал на телеграм Mash дистрибуираше снимка на која се гледаат долги редици луѓе кои чекаат да се качат во авион во источниот регион Хабаровск како дел од операцијата за мобилизација.
На видеото, наводно, снимено во јужната Република Чеченија, се гледаат десетици млади мажи во локална канцеларија за регрутирање кои ги набљудува полицијата.
АФП не можеше независно да ја потврди снимката.
Министерството за одбрана не ги проследи официјалните видеа од регрутните центри и не даде информации за бројот на лица на кои им биле упатени покани.
Во средата Путин најави делумна мобилизација на резервисти, а министерот за одбрана Сергеј Шојгу рече дека на крајот во операцијата ќе бидат повикани 300.000 луѓе.
Повеќе од 1.300 луѓе беа уапсени ширум Русија во средата за време на импровизирани антимобилизациски демонстрации.
