Денеска завршуваат референдумите во Украина
Украинските и руските сили се вклучени во тешки борби во различни делови на Украина.
Борбите се водат додека денеска завршуваат референдумите во самопрогласените народни републики Доњецк и Луганск, Херсон и Запорожје, украински територии кои имаат намера да се приклучат на Русија.
Украинскиот претседател Володимир Зеленски објави дека регионот Доњецк на истокот на земјата сè уште е главен стратешки приоритет на неговата земја, но и на Русија, при што се водат битки за неколку градови додека руските трупи се обидуваат да напредуваат на југ и на запад, пренесува британската агенција Ројтерс.
Судири имаше и во регионот Харков на североисток, кој беше во фокусот на контраофанзивата на Украина овој месец.
Украинските сили продолжија со напорите да онеспособат четири моста и други речни премини за да ги попречат линиите за снабдување на руските сили на југ.
Јужната команда на вооружените сили на Украина во вторникот објави дека во својата контраофанзива на Керсон, непријателот загубил 77 војници, шест тенкови, пет хаубици, три противвоздушни системи и 14 оклопни возила.
Ројтерс вели дека не може независно да ги потврди овие извештаи од бојното поле.
Москва верува дека ќе ги припои регионите Керсон, Луганск, Доњецк и Запорожје, на исток и југ, кои сочинуваат околу 15 отсто од Украина, по декларацијата на референдумот организиран таму од проруските сили.
Ниту една од овие области не е целосно под контрола на Москва и борбите се во тек по целата линија на фронтот, при што украинските сили известуваат за понатамошен напредок откако ги поразија руските војници во регионот Харков на почетокот од овој месец, според британската агенција.
Гласањето за приклучување кон Русија започна во петокот во тие региони и се очекува да заврши денеска, а рускиот парламент би можел да го одобри пристапувањето во рок од неколку дена.
Киев и повеќето земји ги отфрлија овие референдуми и ветија дека нема да ги признаат нивните резултати, пренесува Ројтерс.
