МВР се огласи за мажот кој тепа друго лице на улица, му бил познаник – пријави од нападнатите жени нема
![](https://skopje1.mk/wp-content/uploads/2023/12/Screenshot-2023-12-09-at-18.02.58.png)
Лицето за кое беше снимено како тепа лице на автобуска, а за кое има сведоштва дека нападнало и жени, било приведено во полициска станица. Утврден е неговиот идентитет, како и идентитетот на лицето кое беше тепано. Станува збор за 57-годишен маж со престојувалиште во скопско село. Тие кажале дека се познаници и дека имале недоразбирање.
„Во врска со денешна објава на портали и социјални мрежи проследена со видео запис според која машко лице агресивно се однесува наводно кон случајни минувачи без повод и причина и тепа луѓе по улиците на Скопје. Од страна на полициски службеници од Полициска станица Гази Баба преземени се оперативни мерки и случајот е расчистен, а лицето е пронајдено и со него е извршен службен разговор. Имено, станува збор за Љ.С.(57) од Скопје, со престојувалиште во скопско село, кој појаснил дека инцидентот кој го направил, односно на кој е снимен и објавен на портали и социјални мрежи бил насочен исклучиво кон неговиот познаник А.Д.(51), од скопско, со кого имаат нарушени пријателски односи, при што немал намера да го нападне, туку само го турнал и влечел. Исто така, извршен е разговор и со А.Д., кој го потврдил исказот на познаникот и изјавил дека малку подоцна меѓусебниот проблем го надминале и се смириле. Од страна на Полициска станица Гази Баба против Љ.С. ќе биде поднесен соодветен поднесок“, велат од МВР.
Според сведоштвата до кои дојде „Скопје1“, од истото лице биле натепани и други жени.
Од МВР за „Скопје1“ дополнуваат дека нема никакви пријави од жените.
![](https://skopje1.mk/wp-content/uploads/2022/01/2222.png)