Илјадници трактори го блокираа Берлин: Фармерите од цела Германија протестираа, министерот за финансии беше исвиркан
Земјоделците сосе трактори, утрово дојдоа во центарот во Берлин. Тие пристигнаа од цела Германија за да се приклучат на големиот протест на кој се бара преиспитување на плановите за зголемување на даноците, пренесува Index.hr.
Околу 3.000 трактори, 2.000 камиони и околу 10.000 луѓе се собраа на авенијата што води до берлинската Бранденбуршка порта на масовниот митинг што ги заврши еднонеделните антивладини протести.
Трактори и камиони беа паркирани покрај авенијата, а илјадници земјоделци вееја германски знамиња на студ.
Протестите го зголемија притисокот врз коалицијата на канцеларот Олаф Шолц додека тој се обидува да го поправи буџетскиот хаос и да ги заузда десничарските сили.
Во неделата вечерта, полицијата предупреди дека авенијата е веќе полна и ги повика демонстрантите да се соберат на алтернативни локации, вклучувајќи го и Олимпискиот стадион во западната област Шарлотенбург.
Соочени со жестокото противење, владата веќе се согласи да не ги укинува даночните олеснувања за новите земјоделски возила и се согласи да го продолжи крајот на субвенциите за земјоделскиот дизел за неколку години.
Но, земјоделците, со гласна поддршка од опозициските конзервативци и екстремната десница, велат дека тоа не е доволно.
„Фармерите ќе изумрат“, рече фармерот Карл-Вилхелм Кемпнер додека се качуваше во автобус во Келн за да ги однесе на протестите.
Владата зазеде помирувачки став поради загриженоста дека политичката дебата во земјата станува радикализирана и дека протестите би можеле да станат насилни.
Министерот за финансии Кристијан Линднер се обрати на протестот од бината поставена пред Бранденбуршката порта, на што демонстрантите бурно реагираа и го исвиркаа. Лидерите на коалициските партии ги поканија на дискусија лидерите на протестот.
