Македонија

(ФОТО) Општина Охрид започна активности за отстранување на урбаната опрема лоцирана на крајбрежјето на Охридското Езеро

Avatar
Објавено на

Со отстранување на шанкови, монтажни објекти, конструкции и ѕидови, утрово започна најавената акција за вoведување ред на крајбрежјето на Охридското Езеро, согласно препораките на УНЕСКО. Акцијата ја спроведува Општина Охрид и истата започна на објектите лоцирани на крајбрежјето на Охридското Езеро, на потегот од „Горица 3“ до ЈЗУ Специјализирана болница за превенција, лекување и рехабилитација на кардиоваскуларни заболувања во населбата „Свети Стефан“.

Се работи за урбана опрема и градби кои се надвор од опфатот на Генералниот урбанистички план. По завршувањето на активностите за отстранување на овој потег од крајбрежјето, ќе се пристапи кон отстранување и на останатите објекти, потпорни ѕидови, шанкови, метални конструкции и настрешници, кои исто така се надвор од опфатот на Генералниот урбанистички план и навлегуваат во КП 1/1 Охридско Езеро.
Додека трае акцијата во јавноста се шпекулира колку ниски цени плаќале тие кои менаџирале и кога имале договори. Неофицијално сите плажи заедно плаќале околу 10 000 евра наемнина годишно, а користеле илјадници метри квадратни државно земјиште. Имало и плажи на најатрактивни локации кои плаќале наемнина од околу 40 000 денари годишно, за околу 1000 метри квадратни државна земја.

Инаку Владата на седницата одржана на 10 јуни ја дополни Уредбата со законска сила за примена на Законот за градежно земјиште за време на вонредна состојба, која се однесува на плажите кои биле предмет на закуп, a која предвидува концесионерите чии договори се истечени или раскинати задолжително да ги вратат плажите со кои стопанисувале во првобитна состојба.

фото: Скопје 1

Поврзани вести преку ознаки:

Прочитајте и:

На почеток