Арљинда Хасани Синани е нова вицегувернерка на Народната банка

Собранието ја именуваше Арљинда Хасани Синани за вицегувернерка на Народната банка, на предлог на гувернерот д-р Трајко Славески. Таа ќе ја извршува функцијата со мандат од седум години.

— реклама —

Хасани Синани е дипломирана економистка со 22-годишно професионално искуство во банкарскиот сектор. Во текот на кариерата работела на стручни и раководни позиции во областите на кредитирањето, управувањето со ризици и деловното банкарство.

— реклама —

Има извршувано повеќе раководни функции во „Прокредит банка“ АД Скопје и „Стопанска банка“ АД Скопје. Од 2023 година во „Стопанска банка“ ја извршувала функцијата регионален директор за Северозападниот Регион.

— реклама —

Нејзиното професионално искуство опфаќа и работа поврзана со регулативната и супервизорската рамка, управувањето со ризици и корпоративното управување. Била вклучена и во работата на повеќе органи и комитети во рамките на банкарските институции.

Со нејзиното именување, Народната банка добива дополнителен професионален капацитет за спроведување на своите законски цели и надлежности, насочени кон одржување стабилен и сигурен финансиски систем и поддршка на одржливиот економски развој.