Авион на авиокомпанијата „Норвежиан Ер Шатл“, кој утрово летал од Осло кон Дубровник, бил принудно пренасочен кон Виена, откако за време на летот бил забележан проблем со еден од прозорците.
Летот DY1922 полетал од Осло во 6:45 часот и требало да слета на аеродромот „Руѓер Бошковиќ“ во Дубровник околу 9:40 часот. Сепак, поради напукнат прозорец, екипажот донел одлука за вонредно слетување на аеродромот во Виена.
Авионот безбедно слетал во австриската престолнина, а станува збор за „Боинг 737-800“, стар нешто помалку од 12 години.
Според неофицијални информации, на патниците ќе им биде обезбеден заменски авион, со кој од Виена ќе го продолжат патувањето кон Дубровник во текот на попладневните часови.
