Забрзаниот развој на вештачката интелигенција создава нов притисок врз автомобилската индустрија, бидејќи побарувачката за мемориски чипови значително ги зголеми нивните цени.
Според анализа на консултантската компанија „Керни“, цената на DRAM мемориските чипови на спот-пазарот пораснала за дури 450 отсто во периодот од септември 2025 до јануари 2026 година. Причината е огромната побарувачка од технолошките компании, кои набавуваат големи количини чипови за центрите за податоци што ги користат системите за вештачка интелигенција.
Поради тоа, автомобилските производители се принудени да ги зголемат буџетите за набавка на електронски компоненти.
„Форд“ и „Џенерал моторс“ веќе ги зголемиле планираните трошоци за суровини и компоненти за неколку стотици милиони долари. Од друга страна, „Фолксваген“ соопшти дека засега не се соочува со проблеми во синџирот на снабдување благодарение на мерките што ги воведе по кризата со недостигот на чипови за време на пандемијата.
Сличен став имаат и „Стелантис“, „Рено“ и БМВ, кои наведуваат дека во моментов не планираат намалување на производството. Компаниите очекуваат состојбата постепено да се стабилизира, а дел од нив проценуваат дека пазарот би можел целосно да се нормализира дури во 2028 година.
Сепак, експертите предупредуваат дека ризикот не е надминат. Речиси 90 отсто од светското производство на DRAM чипови потекнува од „Самсунг“, „Микрон“ и „Ес Ке Хајникс“, кои засега не ги зголемуваат значително производствените капацитети.
Бидејќи производителите ги продаваат чиповите на купувачите што нудат највисока цена, технолошките компании што инвестираат милијарди долари во развојот на вештачката интелигенција моментално имаат предност, што повторно ја изложува автомобилската индустрија на ризик од недостиг на клучни електронски компоненти.
