Советникот од ЛДП во Советот на Општина Могила, Илче Дамевски, преку соопштение побара навремена исплата на субвенциите за тутунопроизводителите и подобра комуникација со земјоделците, оценувајќи дека доцнењето на исплатите дополнително ја зголемува неизвесноста во секторот.
„Пелагонија отсекогаш важела за главна житница на Македонија, а Општина Могила е нејзиното срце и столб. Никогаш досега не се случило на средината на јуни тутунарите сѐ уште да ги немаат добиено субвенциите за тутунот. Оваа година тие се и намалени, а сè уште не се исплатени“, изјави Дамевски.
Тој посочи дека тутунопроизводителите од година во година се соочуваат со повисоки производствени трошоци, неизвесни услови и доцнење на мерките што треба да им помогнат.
Од ЛДП велат дека земјоделците не треба да бидат повикувани на трпение, бидејќи, како што нагласуваат, станува збор за планирани и заработени средства.
„Либерално-демократската партија бара само навремена исплата и редовна, навремена комуникација со земјоделците“, истакна Дамевски.
Тој порача дека грижата за земјоделците треба да се покажува преку конкретни политики и навремени мерки, а не преку, како што рече, „празни зборови и скапо платени спотови“.
„На земјоделците им е потребен сигурен партнер. За ЛДП, граѓаните и нивниот труд секогаш се на прво место, затоа што тие значат силна економија и подобар живот за сите“, додаде Дамевски.
