Белата куќа: Извештаите за договор со Иран се целосна измислица

Белата куќа ги демантираше информациите објавени во иранските медиуми за можен меморандум за разбирање меѓу САД и Иран со цел ставање крај на војната, оценувајќи ги како „невистинити и целосна измислица“.

— реклама —

Претходно, иранската државна телевизија објави дека Техеран добил нацрт на неформална рамка за можен договор со Вашингтон за прекин на конфликтот.

Според наводите на иранските медиуми, документот предвидувал Иран во рок од еден месец да го врати комерцијалниот бродски сообраќај низ Ормускиот теснец на нивото пред војната, додека САД би ги повлекле воените сили од близината на Иран и би ја укинале поморската блокада.

— реклама —

Иранската државна телевизија наведе дека рамката сè уште не е финализирана и дека Техеран нема да преземе никакви чекори без „конкретна проверка“ на договореното.

— реклама —

Во информацијата се додава дека евентуален конечен договор, доколку биде постигнат во рок од 60 дена, би можел да биде усвоен како обврзувачка резолуција на Советот за безбедност на Обединетите нации.

Според медиумите во Иран, преговорите меѓу Вашингтон и Техеран се воделе индиректно по почетокот на војната во февруари годинава, а Пакистан имал клучна посредничка улога.

Конфликтот меѓу Иран и Израел ескалираше по серијата меѓусебни напади со ракети и дронови, што доведе до нарушување на бродскиот сообраќај во Персискиот Залив и до директно вклучување на САД, предизвикувајќи стравувања од поширок регионален судир.