Кога граѓаните паркираат возило во Општина Центар, испраќаат СМС порака за плаќање или користат повластена паркинг карта, најчесто ја забележуваат само услугата што ја добиваат. Но, зад секое слободно паркинг место стои комплексен систем на организација, логистика и техничка поддршка што секојдневно го спроведува ЈП Паркинзи на Општина Центар (ПОЦ).
Од претпријатието посочуваат дека ПОЦ одамна не претставува само сервис за наплата на паркинг, туку систем кој секојдневно обезбедува функционално користење на паркинг просторот за илјадници возила, со цел создавање поуреден и пофункционален Центар.
ПОЦ управува со зонското паркирање во Општина Центар, кое е поделено на повеќе зони и сектори со различен режим на користење. Воедно, претпријатието стопанисува и со затворени паркиралишта со рампа, како и со јавни и монтажни гаражи кои претставуваат значаен дел од вкупниот паркинг капацитет.
Секојдневното функционирање на системот подразбира обележување и одржување на паркинг местата, поставување и обновување на сообраќајната сигнализација, контрола на користењето на просторот, како и грижа за безбедноста и достапноста на услугите.
Голем дел од работата на претпријатието се однесува и на издавањето и администрирањето на повластените паркинг карти за жителите на Општина Центар. Со најавените измени, со кои се предвидува бесплатно паркирање за првото возило по станбена единица, ќе се применува попрецизен систем на евиденција и контрола, со цел пофер и поефикасно користење на паркинг просторот.
Освен за жителите, ПОЦ издава и месечни карти за правни лица, компании, вработени и други корисници кои редовно ги користат услугите.
Во последните години значително е зголемен бројот на електронски услуги достапни за граѓаните. Плаќањето преку СМС порака, скенирање QR-кодови, мобилни апликации и електронски картички овозможуваат побрзо и поедноставно користење на услугите.
Преку електронските платформи, корисниците можат да добијат информации, да користат различни типови паркинг услуги и да управуваат со своите кориснички профили без потреба од физичко присуство. Токму дигитализацијата е еден од сегментите во кои претпријатието планира дополнителни инвестиции во наредниот период.
Од ПОЦ потенцираат дека ниту еден систем на паркирање не може да функционира без контрола и почитување на правилата. Затоа, секојдневно се спроведуваат контроли на терен преку овластените служби, чија задача е да обезбедат правилно користење на паркинг просторот и да спречат злоупотреби.
Во случаи на непрописно паркирање, попречување на сообраќајот или користење паркинг простор без право, интервенира специјалната служба „Пајак“ во соработка со сообраќајната полиција, како и службите задолжени за поставување блокатори на возила.
„За ПОЦ, паркирањето не е само обезбедување место за возило. Тоа е секојдневно управување со ограничен јавен ресурс кој треба да биде достапен, функционален и правично распределен“, посочуваат од претпријатието.
Оттаму додаваат дека новите правила, дигитализацијата и инвестициите во системот се насочени кон обезбедување повеќе ред, подобра услуга и поголема достапност на паркинг просторот за жителите на Општина Центар.
