Би-би-си во историска криза: Се извини на Трамп, но рече дека не може да ги тужи

Голема медиумска бура ја тресе британската јавна телевизија Би-би-си, која испрати лично извинување до американскиот претседател Доналд Трамп, но истовремено соопшти дека нема правна основа неговиот тим да покрене тужба за клевета поради документарец емитуван во емисијата „Панорама“ само неколку дена пред изборите во САД во 2024 година.

— реклама —

Контроверзниот документарец содржел погрешно монтиран сегмент од говорот на Трамп од 6 јануари 2021 година, денот кога толпа поддржувачи го упадна во Капитол. Начинот на кој бил споен материјалот создавал привид како претседателот директно да повикува на насилство. Телевизијата призна „грешка во проценката“ и изрази жалење за монтажата, но категорично одби дека постои основ за клевета.

— реклама —

Адвокатите на Трамп претходно побараа од Би-би-си до недела да го повлече документарецот, да се извини јавно и да исплати до една милијарда долари отштета поради, како што тврдат, „финансиска и репутациска повреда“. На барањата уследи одговор: претседателот на Би-би-си, Самир Шах, испратил лично писмо до Белата куќа, со официјално извинување и признание дека телевизијата „погрешила во проценката“.

— реклама —

Ситуацијата дополнително се влоши кога „Телеграф“ откри дека и другата позната информативна програма, „Њузнајт“, користела слично монтирана снимка од истиот говор. Скандалот доведе до оставки на двајца високи раководители, отворајќи ја најголемата институционална криза за јавниот сервис во последните неколку децении.

— реклама —

Би-би-си, кој се финансира главно преку радиодифузната такса во Велика Британија, моментално функционира без постојан генерален директор. Владата на Кир Стармер паралелно води дебата за идниот модел на финансирање. Премиерот, и покрај контроверзиите, повтори дека поддржува „силен и независен Би-би-си“ кој, како што рече, претставува значаен столб на британската мека моќ во светот.