Пратеникот на СДСМ, Фатмир Битиќи, денес на прес-конференцијата побара од премиерот Христијан Мицкоски и министерката за финансии Гордана Димитриеска-Кочоска да одговорат дали Владата подготвува ново задолжување од околу 350 милиони евра.
На прес-конференција во Собранието, Битиќи оцени дека евентуалното ново задолжување би значело, како што рече, „нова должничка епизода на грбот на народот“.
Тој посочи дека Владата зборува за економска стабилност, но, според него, во пракса постојано отвора простор за нови задолжувања.
„Снемува пари во Буџетот. Погрешните политики на Мицкоски и Кочоска ја туркаат Македонија и идните генерации во должничко ропство“, изјави Битиќи.
Пратеникот на СДСМ обвини и дека Владата брзала со носењето на одлуката за задолжување од 260 милиони евра и притоа ги прекршила собраниските процедури.
Тој најави дека пратеничката група на СДСМ ќе поднесе интерпелација и кривична пријава против претседателот на Собранието поради, како што рече, „грубо кршење на процедурите и злоупотреба на Собранието“.
Битиќи додаде дека состојбата во Буџетот е сериозна и дека власта со нови кредити ги покрива финансиските проблеми.
Според него, за две години Владата создала нов долг од 2,5 милијарди евра, а јавниот долг достигнал 11 милијарди евра.
Тој оцени и дека условите под кои Владата се задолжува покажуваат недоверба од меѓународните финансиски пазари кон економските политики на власта, посочувајќи дека од бараните 300 милиони евра од банките, биле обезбедени 260 милиони евра со камата од 4,6 проценти.
