Битиќи: Граѓаните се соочуваат со раст на цените и инфлацијата

Пратеникот на СДСМ, Фатмир Битиќи, во гостување во емисијата „24 анализа“ изјави дека економските показатели укажуваат на раст на инфлацијата, зголемување на цените и на трошоците за живот, како и притисок врз јавните финансии.

— реклама —

Тој нагласи дека, според официјалните податоци, инфлацијата е зголемена, а граѓаните тоа директно го чувствуваат преку повисоки цени на основните производи. Како пример, посочи дека во март е забележан раст кај овошјето од 16,3%, безалкохолните пијалаци 10,7%, месото 7,9%, млекото, сирењето и јајцата 4,2%, додека кај кафето растот е околу 25%.

Битиќи наведе дека минималната плата не е зголемена во ист период, што, според него, дополнително ја влошува состојбата на граѓаните. Тој додаде дека вкупната инфлација во март изнесува околу 4,9 до 5%.

— реклама —

Во однос на јавните финансии, тој се повика на податоци од Министерството за финансии и истакна дека буџетскиот дефицит продолжува да расте, наведувајќи дека заклучно со 25 април изнесува околу 30 милијарди денари, наспроти околу 28 милијарди денари кон крајот на март.

— реклама —

Битиќи посочи и дека јавниот долг останува на околу 60 отсто, при што државата продолжува со задолжување преку обврзници и кредити. Како пример го спомена и проектот „Бехтел и Енка“, за кој рече дека бил префрлен на ЈПДП поради недостиг на средства, како и најави за дополнително задолжување.

Тој оцени и дека се водат преговори за билатерален договор со држава надвор од Европската Унија, што, според него, може да резултира со ново задолжување од една до две милијарди евра.

Според Битиќи, овие трендови покажуваат дека економската состојба не е стабилна и дека притисокот врз граѓаните продолжува да расте.