Братот на Виктор Орбан меѓу осомничените за трговија со луѓе, полицијата бара притвор

Четири лица се приведени во Унгарија под сомнение за трговија со луѓе во рамки на организирана криминална група, а полицијата побарала да им биде одреден притвор. Според унгарските медиуми, меѓу осомничените е и Арон Орбан, брат на поранешниот унгарски премиер Виктор Орбан, иако неговото име не е наведено во официјалното полициско соопштение.

Националното истражно биро го завршило сослушувањето на осомничените, приведени во понеделникот, а во истрагата учествуваат и Националната канцеларија за враќање и заштита на имотот и Европол.

— реклама —

Според сомневањата на истражителите, во текот на неколку месеци во 2024 година осомничените им помагале на виетнамски државјани да добијат унгарски визи и потоа да заминат во Западна Европа, наплаќајќи им таканаречени регрутни такси.

Досегашната истрага покажала дека на овој начин им помогнале на повеќе од 100 виетнамски државјани. Како причина за краткорочниот престој во Унгарија тие пријавувале учество на курсеви за стручна обука, но повеќето не ги посетувале курсевите и не ја напуштале земјата по истекот на визите. Истражителите се сомневаат дека вистинската цел била преку Унгарија да стигнат до Западна Европа.

— реклама —

При претреси на повеќе локации во Будимпешта и во областа Пешта биле одземени документи, електронски податоци и уреди што би можеле да послужат како докази во истрагата за трговија со луѓе и корупција. Еден од осомничените се товари и за трговија со влијание.

— реклама —

По приведувањата се огласи и Виктор Орбан, кој на социјалните мрежи оцени дека станува збор за политичка пресметка и дека неговиот брат е искористен за напад врз него.

„Јас сум целта, мојот брат е само средство“, напиша Орбан, обвинувајќи дека целта е отстранување на политички противник и воспоставување еднопартиски систем.

— реклама —

На неговите изјави реагираше унгарскиот премиер Петер Маѓар, кој оцени дека поранешниот премиер веднаш се обидел одговорноста да ја префрли на други и да се претстави како жртва.

Претставници на Фидес тврдат дека постапката против Арон Орбан се води по политичка наредба, додека опозицијата и дел од стручната јавност отвораат прашања за владеењето на правото, времето на покренување на истрагата и протекувањето службени информации.