Орбан го обвини Туск за обид за државен удар против сопствениот народ

Поранешниот унгарски премиер Виктор Орбан го обвини полскиот премиер Доналд Туск дека се обидел да изврши државен удар против сопствениот народ, реагирајќи на кризата околу Уставниот суд во Полска.

— реклама —

„Никогаш не мислев дека Доналд Туск ќе отиде толку далеку за да изврши државен удар насочен против сопствениот народ“, напиша Орбан на социјалната мрежа Икс.

Тој оцени дека настаните во Варшава во петокот претставувале грубо кршење на полскиот Устав и изрази поддршка за претседателот Карол Навроцки во неговите напори да го заштити уставниот поредок во земјата.

— реклама —

Кризата избувна откако во петокот беше објавено дека се суспендирани претседателот на Уставниот суд, Богдан Швјончковски, и потпретседателот Бартломеј Сохански. Судијката Ана Корвин-Пјотровска потоа соопшти дека ја презела функцијата претседателка на судот. Пред седиштето на институцијата следуваа тензии и протести, поради што интервенирала и полицијата.

— реклама —

Полскиот претседател Навроцки го обвини Туск за насилно преземање на Уставниот суд. Тој го прекина патувањето во Сенегал и се врати во Варшава, каде што во текот на ноќта пристигна во седиштето на судот. Таму дошло до спор меѓу претставниците на претседателот и судиите избрани од актуелниот состав на полскиот парламент.

По напуштањето на зградата, Навроцки најави итни консултации со претставниците на парламентарните партии, оценувајќи дека е нарушен уставниот поредок.

Туск, од друга страна, порача дека обновувањето на владеењето на правото е обврска на неговата влада и дека процесот, по годините на незаконитости за време на претходната власт, е тежок и бара одлучно дејствување.