Европската Унија смета дека сите индивидуални санкции што ги воведе, вклучително и оние против Татјана Навка, сопругата на портпаролот на Кремљ, Дмитриј Песков, се оправдани и засновани на цврсти докази.
Портпаролот на Европската комисија, Ануар ел Ануни, изјави пред новинарите дека ЕУ смета оти Навка оправдано се наоѓа на листата на санкционирани лица, пренесува „Украинска правда“.
На прашањето колку Европската комисија е сигурна во оправданоста на санкциите против сопругата на Песков, Ел Ануни одговори:
„Многу, многу сме сигурни.“
Тој истакна дека за воведување санкции против поединци или организации, Европската Унија мора да располага со доволно докази, бидејќи санкциите претставуваат правни одлуки кои можат да бидат оспорени пред Судот на Европската Унија.
„Татјана Навка е косопственичка на компании и недвижности, меѓу другото и на полуостровот Крим, кој, како што сите знаете, Руската Федерација незаконски го анектираше. Со тоа таа поддржува активности што го поткопуваат или загрозуваат територијалниот интегритет, суверенитетот и независноста на Украина“, изјави портпаролот на Европската комисија.
Ел Ануни додаде дека Навка е поврзана и со лице кое се наоѓа на листата на санкционирани и кое активно поддржувало активности или политики што, според ставот на ЕУ, го поткопуваат или загрозуваат територијалниот интегритет, суверенитетот и независноста на Украина, како и стабилноста и безбедноста на земјата.
„Се надевам дека ова е доволно за да разберете колку сме сигурни во оправданоста на санкциите“, заклучи Ел Ануни.
Инаку, Татјана Навка, сопруга на портпаролот на Кремљ Дмитриј Песков и олимписка шампионка во уметничко лизгање, се обрати до судот со барање да ги оспори санкциите што ѝ ги воведе Европската Унија.
ЕУ ја стави Навка на листата на санкционирани лица во јуни 2022 година. На истата листа се најдоа и ќерката на Песков, Јелизавета, како и неговиот син Николај.
