Кремљ се огласи по оставката на Александар Вучиќ од функцијата претседател на Србија, при што портпаролот Дмитриј Песков порача дека односите меѓу Русија и Србија се поважни од односите со поединци.
Песков за руските медиуми изјави дека Москва очекува продолжување на конструктивниот развој на односите со Белград во сите области, независно од оставката на Вучиќ.
„Односите Русија-Србија се далеку поважни од односите со поединци“, изјави Песков, одговарајќи на прашање дали Русија очекува да ги задржи добрите односи со Србија и дали е подготвена да ги гради со кој било лидер на земјата.
Тој додаде дека ќе продолжат контактите со политичкото раководство и економските субјекти во Србија.
Песков потсети и на неодамнешниот телефонски разговор меѓу рускиот претседател Владимир Путин и Вучиќ, во кој, како што наведе, биле разменети детални информации за актуелната ситуација.
Во разговорот со Путин во саботата, Вучиќ изразил благодарност за 14-годишната соработка и надеж дека идните српски претседатели ќе водат одговорна надворешна политика, одржувајќи „одредена рамнотежа меѓу сите фактори на меѓународната сцена“.
Вучиќ, кој синоќа поднесе оставка од функцијата претседател на Србија, денеска ја предаде должноста на претседателката на Народното собрание, Ана Брнабиќ. Таа ќе ја извршува функцијата в. д. претседател до изборот на нов шеф на државата.
