Портпаролот на Кремљ, Дмитриј Песков, изјави дека падот на конкурентноста на германската економија во голема мера е поврзан со одлуката на Берлин да престане да купува руски гас и да се префрли на поскапи енергенси од други земји, пред сè од САД.
„Забележавме дека падот на конкурентноста на германската економија главно е последица на фактот што Германија престана да купува евтин руски гас. Наместо тоа, почна да купува многу скап гас од други земји, пред сè од САД“, рече Песков, пренесе РИА Новости.
Осврнувајќи се на изборите во Мекленбург-Западна Померанија, каде што Алтернатива за Германија (АфД) освои најмногу гласови, Песков оцени дека станува збор за внатрешно прашање на Германија. Сепак, посочи дека се забележува ниска поддршка за актуелната германска влада.
На изборите одржани на 20 септември, АфД освои 38,2 отсто од гласовите, додека Христијанско-демократската унија (ЦДУ) освои 4,9 отсто и не го помина изборниот праг од пет проценти.
Песков изјави и дека дел од германските граѓани бараат алтернатива на актуелната власт поради економската состојба.
Говорејќи за санкциите кон Русија, портпаролот на Кремљ наведе дека против Москва биле воведени повеќе од 30.000 различни мерки, но дека Русија, според неговите зборови, во голема мера се приспособила на нив.
Во врска со американскиот закон со кој се овозможува воведување дополнителни санкции кон Русија, Песков оцени дека таквиот потег не придонесува за подобрување на односите меѓу Москва и Вашингтон ниту за напредок во решавањето на украинското прашање.
Песков повторно го критикуваше и НАТО, нарекувајќи го „инструмент на конфронтација“, додека истовремено порача дека Русија, како што тврди, не претставува закана за ниту една европска држава.
