Брисел со предупредување до Косово по измените на законот за Специјализираните совети во Хаг

Европската Унија изрази длабока загриженост поради измените на Законот за Специјализираните совети на Косово во Хаг, кои во вторникот вечерта беа усвоени од косовскиот парламент. Според Брисел, измените не се во согласност со меѓународните обврски на Косово кон ЕУ.

— реклама —

Со измените се стеснува надлежноста на Специјализираните совети, се намалуваат максималните казни и се воведува можност за помилување.

— реклама —

„Апелираме Косово да ги почитува своите меѓународни обврски за гарантирање на судската независност на Специјализираните совети на Косово, како и својата посветеност да обезбеди одговорност и правда за жртвите и нивните семејства од сите заедници во Косово“, изјави портпаролот на ЕУ.

Од Брисел нагласуваат дека ја поддржуваат работата на Специјализираните совети како независни судски институции и дека нивната независност мора целосно да се почитува. Според ЕУ, тие ја спроведуваат правдата врз основа на принципот на индивидуална кривична одговорност.

— реклама —

Загриженост за законските измени изрази и германската амбасада во Косово. Портпаролката Каталин Хајне порача дека независноста на Специјализираните совети мора да се почитува за тие да можат да ја исполнат својата мисија за обезбедување одговорност и правда за жртвите од сите заедници.

Измените беа предложени од Демократската партија на Косово, а беа усвоени со поддршка од партијата на премиерот Албин Курти. Таа поддршка дојде откако партијата на Курти доби поддршка за изборот на новата претседателка на Косово, Јустина Широка-Пула.