Цената на нафтата над 110 долари поради стравувања од ескалација меѓу САД и Иран

Цените на нафтата утрово повторно пораснаа, поттикнати од растечките тензии меѓу САД и Иран, како и од стравувањата за нарушување на глобалното снабдување со енергенси.

Цената на суровата нафта од типот Brent Crude се зголеми за околу 1,5 проценти и достигна 110 долари за барел, додека американската West Texas Intermediate (WTI) порасна за 1,8 проценти, на околу 107 долари за барел.

— реклама —

Растот на цените следува по предупредувањето на американскиот претседател Доналд Трамп дека на Техеран му „истекува времето“ за постигнување договор со Вашингтон.

— реклама —

Иранските медиуми, пак, објавија дека преговорите остануваат во ќор-сокак и дека американската страна не понудила „конкретни отстапки“.

Дополнителна загриженост на пазарите предизвикаа нападите врз енергетската инфраструктура во Персискиот Залив, меѓу кои и напад врз нуклеарен објект во Обединетите Арапски Емирати, како и нови напади со дронови насочени кон ОАЕ и Саудиска Арабија.

— реклама —

Во меѓувреме, администрацијата на Трамп повторно воведе санкции за руската нафта, што дополнително ги зголеми стравувањата за ограничени глобални залихи.

— реклама —

Во фокусот на светските пазари останува и Ормутскиот теснец, низ кој поминува речиси една петтина од светските испораки на нафта и течен природен гас. Теснецот е клучна рута за извоз на енергенси од земји како Саудиска Арабија, Ирак и Катар.

Иранскиот министер за надворешни работи Абас Арагчи изјави дека Техеран нема доверба во САД, но додаде дека Иран и понатаму е подготвен и за дипломатски разговори и за можен обновен конфликт.