Цената на нафтата падна под 80 долари

Цените на нафтата денеска паднаа под 80 долари за барел на меѓународните пазари, поттикнати од најавите за интензивирање на дипломатските напори за постигнување решение што би овозможило нормализирање на пловидбата низ Ормускиот Теснец.

— реклама —

На лондонскиот пазар цената на барелот се намали за 3,85 долари и изнесуваше 79,92 долари, додека на американскиот пазар барелот поевтини за 4,16 долари, на 76,18 долари.

— реклама —

Пазарите позитивно реагираа и на одлуката на американскиот претседател Доналд Трамп да се откаже од нов бран напади врз иранската енергетска инфраструктура и да остави повеќе простор за дипломатија.

— реклама —

Во меѓувреме, Иран соопшти дека не води преговори со САД, туку разговара со Оман за воспоставување привремена безбедна поморска рута низ Ормускиот Теснец. Истовремено, Катар иницираше разговори со лидерите на земјите од Персискиот Залив за намалување на регионалните тензии и постигнување поширок мировен договор.

— реклама —

И покрај падот на цените, аналитичарите предупредуваат дека неизвесноста останува висока, бидејќи во регионот и натаму се регистрираат безбедносни инциденти, вклучително и напад врз трговски брод во близина на Оман.