Цените на нафтата денеска паднаа на меѓународните пазари, откако инвеститорите беа охрабрени од пораките од САД за можно брзо завршување на конфликтот со Иран и од информациите дека супертанкери повторно минуваат низ Ормускиот Теснец.
На лондонскиот пазар цената на барел нафта падна под 107 долари, додека на американскиот пазар се движеше околу 100 долари за барел.
Доналд Трамп изјави дека постојат „многу добри“ шанси за договор со Иран за ограничување на нуклеарната програма и порача дека војната би можела да заврши „многу брзо“.
Во меѓувреме, иранските медиуми објавија дека Техеран бара прекин на непријателствата, укинување на санкциите, одмрзнување на иранскиот имот во странство и повлекување на американските сили од базите во регионот.
Според Иранската револуционерна гарда, во последните 24 часа низ Ормускиот Теснец поминале 26 бродови, меѓу кои и нафтени танкери.
Пазарите дополнително ги смири и информацијата дека два големи кинески танкери со околу четири милиони барели нафта успешно го напуштиле теснецот.
