Центрите за податоци стануваат воени цели, Европа предупредена да ги преиспита плановите за вештачка интелигенција

Нападите врз центрите за податоци во Русија и Украина покажуваат дека овие објекти стануваат сè поважни воени цели, чие уништување може да предизвика сериозни последици за економијата и клучните јавни услуги. Русија напаѓала центри во Киев, додека Украина возвратила со напади со беспилотни летала врз повеќе вакви објекти на руска територија.

Киев ги опиша украинските напади како удари врз локации што обезбедуваат приходи за финансирање на руската војна. Според „Еуроњуз“, новата состојба треба да ја поттикне Европа сериозно да ги преиспита плановите за изградба на инфраструктура за вештачка интелигенција.

Мехди Парјави, советник при Обединетите нации и основач на тинк-тенкот Меѓународна управа за центри за податоци (IDCA), смета дека нападите се јасно предупредување за европските држави.

— реклама —

„Ако погодите доволно важни цели, можете да урнете цела економија“, изјавил Парјави за „Еуроњуз некст“. Тој објаснил дека со сè поголемата дигитализација на општествата, онеспособувањето на еден центар за податоци може да доведе до „парализа на воените, здравствените и финансиските функции“.

Центрите за податоци се физички објекти во кои компаниите ги сместуваат серверите и ги чуваат податоците. Тие се клучни и за развојот и функционирањето на вештачката интелигенција, за која се потребни огромни количества енергија. Нивната важност во војната дополнително расте бидејќи Украина користи вештачка интелигенција за насочување на беспилотни летала и за други воени цели.

Парјави смета дека фактот што центрите за податоци станале воени мети ги принудува државите повнимателно да ги избираат локациите за нивна изградба. Според него, досегашните препораки за чување на локациите во тајност и внимателен избор на теренот веќе не се доволни.

„Можеби ни се потребни системи за заштита како „Железната купола“; можеби треба да ги градиме под земја или во бункери“, рекол тој, без да навлегува во детали поради прашањата поврзани со националната безбедност.

— реклама —

„Помина времето кога центрите за податоци се градеа на случајно избрани локации“, додал Парјави. Сепак, признал дека ниту една држава сè уште нема јасен одговор како да се спроведат ваквите мерки, а притоа да не се забави трката за развој на капацитетите за вештачка интелигенција.

На прашањето дали нападите ќе ги натераат европските влади да ги преиспитаат плановите за таканаречените „гигафабрики за вештачка интелигенција“, посебен вид центри за податоци, Парјави одговорил потврдно.

Портпарол на Европската комисија потврдил за „Еуроњуз некст“ дека е отворен повик за воспоставување до седум вакви постројки низ Европа.

— реклама —

„Повикот сè уште е отворен. По неговото затворање, предлозите ќе бидат оценети, а потоа ќе бидат донесени одлуки за доделување“, соопштиле од Комисијата.

Рокот за поднесување предлози истекува на 12 ноември. Европската комисија не дала конкретен одговор дали воените напади врз центрите за податоци ќе влијаат врз постојните планови.

Економската штета од уништувањето на ваквите објекти може да биде огромна. Парјави предупредил дека за многу региони, вклучително и Европа, замената на уништената опрема би можела да биде речиси неповратен процес. Изградбата на еден центар за податоци може да чини до 25 милијарди долари и да трае до три години.

„Европа не може да си дозволи да финансира инфраструктура вредна стотици милијарди долари, која некој потоа едноставно ќе ја уништи“, изјавил Парјави, додавајќи дека очекува целиот процес на изградба да мора да се забави.

Тој ги повикал европските држави да дејствуваат заеднички, бидејќи смета дека ниту една земја не може сама да се справи со овој проблем. Како дополнителни предизвици ги посочил глобалниот недостиг од енергија и недостигот од квалификувана работна сила.

Наместо изградба на центри на различни локации, Парјави предлага нивно групирање во посебни зони, над кои би можеле да се постават заштитни системи слични на „Железната купола“.

„Изградбата на безбедни центри за податоци и дигитални јазли е единствениот начин на кој една држава или компанија може да се заштити“, заклучил тој.