Четири лица приведени по седум случаи на семејно насилство во едно деноноќие

Во текот на изминатите 24 часа полицијата постапувала по седум пријави за семејно насилство низ државата, при што четири лица биле лишени од слобода, а со едно лице бил извршен службен разговор.

Во Тетово, утрово бил приведен 44-годишен жител на гостиварското село Добридол, со престој во Тетово, поради сомнение дека извршил семејно насилство врз својата сопруга.

— реклама —

Во Скопје, на подрачјето на Гази Баба, полицијата привела 46-годишен скопјанец кој, според пријавата, физички ги нападнал своите родители и им се заканувал на членовите на семејството.

— реклама —

На подрачјето на Шуто Оризари бил лишен од слобода 40-годишен маж, откако со остар предмет им се заканувал на својата вонбрачна партнерка и нивната ќерка, а притоа оштетил и дел од покуќнината.

Во Виница, пак, била приведена 29-годишна жена поради сомнение дека со метален предмет физички ја нападнала својата 51-годишна мајка и ѝ нанела повреди. Повредената била згрижена во Општата болница во Кочани.

— реклама —

Во Полициската станица Драчево бил извршен службен разговор со 63-годишен скопјанец, по пријава дека физички ја нападнал својата сопруга.

Дополнително, во СВР Скопје биле пријавени уште два случаи на семејно насилство. Во едниот, 37-годишна жена пријавила дека нејзиниот вонбрачен партнер ѝ истурил хемиско средство во пределот на лицето и очите, по што ѝ била укажана лекарска помош во Клиничкиот центар „Мајка Тереза“. Во другиот случај, 33-годишна жена пријавила дека нејзиниот сопруг ѝ упатувал закани во семејниот дом на подрачјето на Бит Пазар.

Од Министерството за внатрешни работи информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.