Четиригодишно девојче од БиХ почина од струен удар во Италија

Четиригодишно девојче почина по струен удар во семејна куќа во местото Мота де Конти, во италијанската покраина Верчели, додека престојувало кај своите баба и дедо.

— реклама —

Несреќата се случила на 19 јули, а девојчето веднаш било пренесено во болницата во Казале Монферато, каде што лекарите не успеале да му го спасат животот. Семејството потекнува од Босна и Херцеговина, а телото на девојчето ќе биде пренесено во татковината.

— реклама —

Според првичните информации од италијанската полиција, девојчето најверојатно се обидело да го вклучи светлото во една од просториите кога доживеало струен удар. Истражителите проверуваат дали несреќата била предизвикана од неизолирани електрични жици во куќата.

Обдукцијата веќе е извршена, а италијанските медиуми објавија дека на еден од прстите на девојчето била забележана повреда која упатува на струен удар. Се испитува и можноста во моментот на несреќата да било босо.

— реклама —

Обвинителството во Верчели отвори истрага за да ги утврди точните околности под кои настанала трагедијата. Во куќата се вршат дополнителни увиди и проверки на електричната инсталација, а дел од објектот е запечатен.

Според соседите, семејството се доселило во местото пред неколку месеци. Градоначалничката на Мота де Конти, Емануела Квирчи, изрази сочувство до семејството и порача дека локалната заедница е со нив во овие тешки моменти.:::