Штрајкови низ Италија поради растот на трошоците за живот, се очекуваат прекини во сообраќајот

Италија во петок ќе биде зафатена од големи штрајкови и протести поради растот на трошоците за живот и издвојувањето јавни средства за воени цели. Синдикатите бараат повисоки плати што ќе го следат растот на инфлацијата, како и поголема поддршка за граѓаните кои сè потешко ги покриваат основните трошоци.

— реклама —

Синдикатот УСБ повика на штрајк во јавниот и приватниот сектор, а главниот протест ќе се одржи во Рим. Се очекува и студентите да излезат на улиците во поголемите италијански градови. Генерален штрајк, со исклучок на сообраќајниот сектор, најавија и синдикатите Кобас, АДЛ, Клап и Сијал.

— реклама —

Се очекуваат сериозни нарушувања во сообраќајот. Железничкиот сообраќај ќе биде во прекин од четврток во 21 часот до петок во 20:59 часот, додека штрајкот во воздушниот сообраќај ќе трае во текот на целиот петок. Во штрајкот ќе се вклучат и таксистите, а работниците на автопатиштата ќе ја прекинат работата во четврток навечер. Прекини во локалниот јавен превоз ќе има во зависност од градот.

Покрај протестите поради животните трошоци, пристанишните работници во петок ќе организираат меѓународна акција против трговијата со оружје, повторното вооружување и милитаризацијата на пристаништата. Организаторите соопштуваат дека во мобилизацијата се вклучиле работници од повеќе од 100 пристаништа во 17 земји на четири континенти. Во Италија, протестите ќе ги опфатат пристаништата во Џенова, Ливорно, Трст, Чивитавекија, Анкона, Равена и Џоја Тауро.

— реклама —

Меѓу главните барања на синдикатите е повторно воведување на системот „скала мобиле“, со кој платите автоматски се приспособувале на инфлацијата. Тие бараат и мерки за намалување на цените на основните прехранбени производи, сметките и кириите, како и понизок ДДВ за основните потреби.

Од синдикатот УСБ велат дека владата издвојува премногу средства за војската, додека финансирањето на здравството, образованието и другите јавни услуги останува недоволно.