Центарот за управување со кризи информира дека до 13 часот денеска се регистрирани вкупно 13 пожари на отворен простор, од кои четири се активни, седум се под контрола, а два се целосно изгаснати.
Активни се пожарите во општина Македонски Брод, кај селото Белица, на месноста Кајорец, од каде што пожарот се проширил кон месноста Дабова Дупка – Јасен и зафатил нискостеблеста и мешана шума; во општина Чучер-Сандево, кај селото Брест, на месноста Рамно, каде што гори мешана шума; во општина Неготино, кај селото Дуброво кон селото Војшанци, каде што гори ниска вегетација; и во општина Новаци, кај селото Бач, каде што гори ниска вегетација и стрниште.
Под контрола се пожарите во општина Македонски Брод, кај селото Бенче, каде што гори мешана листопадна шума; во општина Кичево, кај селото Тајмиште, на месноста Дарда, каде што гори ниска вегетација; во Делчево, на градската депонија, каде што гори отпад; во општина Сарај, кај селото Копаница, каде што гори ниска вегетација и мешана шума; во Охрид, кај селото Буково, каде што гори отпад; во општина Струга, на потегот Буринец – Локов – Селце – Елевци, каде што гори високостеблеста шума; и во општина Ново Село, кај селото Стиник, каде што има внатрешно горење на трупци.
Целосно се изгаснати два пожари – кај селото Ругинце во општина Старо Нагоричане, каде што гореле ниска вегетација и дрва, и кај селото Штавица во општина Прилеп, каде што горела ниска вегетација.
