Поранешниот директор на Токсикологија и поранешен пратеник, доктор Андон Чибишев, реагираше на информациите што се шират на социјалните мрежи за наводна контаминација на водата за пиење во Скопје со бактеријата Escherichia coli.
Чибишев вели дека не го разбира мотивот за ширење на, како што ги нарекува, дезинформации, посочувајќи дека последиците од евентуална бактериска контаминација би можеле да бидат сериозни.
„Не знам дали тие болни умови знаат што значи таквото загадување. Иако бактеријата Escherichia coli кај сите и во сите случаи не предизвикува симптоми и болест, доволно е само 10 отсто од жителите на Скопје да развијат слика на воспаление на цревата; тоа ќе значи дека за ден-два ќе има над 50.000 пациенти“, наведува Чибишев.
Според него, такво сценарио би претставувало сериозен предизвик за државата и здравствениот систем.
Чибишев упати апел до МВР итно да ги истражи информациите што се шират и да утврди кој стои зад нив.
„МВР е на потег: итно да се откријат нарачателите, креаторите и промоторите на оваа гнасна лага, која внесе недоверба и страв кај граѓаните на Скопје. Без милост, без селективност. Господ напомош!“, порача Чибишев.
Информациите за наводно присуство на E. coli во скопската вода претходно беа демантирани од надлежните институции, а МВР соопшти дека Секторот за компјутерски криминал презема мерки за утврдување на профилите од кои се ширеле непоткрепените тврдења.
