Шпанската метеоролошка агенција (Aemet) издаде црвено предупредување за екстремно високи температури во делови од Каталонија, Валенсија и Сарагоса, каде што во текот на денот се очекува живата во термометарот да достигне меѓу 40 и 42 Целзиусови степени.
Највисокото ниво на предупредување укажува на исклучително опасни временски услови, со можни сериозни последици за населението и материјалните добра.
Според прогнозите, новиот топлотен бран ќе трае до задутре.
Шпанија е една од европските земји што најсилно ги чувствува последиците од климатските промени. Иако високите летни температури не се невообичаени, во последните години земјата се соочува со сè почести и поинтензивни топлотни бранови.
Од Aemet посочуваат дека ова е втор топлотен бран ова лето, по јуни, кој беше вториот најтопол месец досега забележан, со просечна температура за 3,2 степени Целзиусови над повеќегодишниот просек.
Минатото лето Шпанија се соочи со најразорните шумски пожари во поновата историја. Честите горештини, во комбинација со намалените врнежи и сувата вегетација, создаваат услови за брзо ширење на шумски и нискостеблести пожари.
