(Видео) Генералниот штрајк во Шпанија заврши со судири, пожари и ограбени продавници

Генералниот штрајк во Шпанија, прв по 14 години, кој беше организиран поради станбената криза и високите трошоци за живот, заврши со насилни судири и најмалку 75 приведени лица. Низ земјата биле регистрирани вкупно 1.044 инциденти, а во протестите учествувале околу четири милиони работници.

Најжестоки судири имало во Барселона, каде што маскирани демонстранти палеле контејнери, кршеле излози и фрлале пиротехнички средства кон полицијата. Полицајците одговориле со солзавец. Оштетени биле меѓу шест и десет продавници, а приведени биле 50 лица.

— реклама —

— реклама —

Насилни инциденти имало и во Мадрид, каде што полицијата употребила солзавец, бибер-спреј и проектили од пена против дел од демонстрантите. Во главниот град протестирале околу 120.000 луѓе, додека во Барселона на улиците излегле повеќе од 50.000.

Штрајкот го организирале најголемите синдикати во Шпанија, кои бараат мерки за решавање на станбената криза и намалување на трошоците за живот. Според податоците што ги пренесуваат агенциите, во земјата недостигаат околу 750.000 станови, а просечната месечна кирија достигнала 1.176 евра.

— реклама —

— реклама —

Протестите предизвикале прекини во производството и сериозни нарушувања во железничкиот, градскиот и јавниот превоз. Синдикалните лидери го оценија одзивот како масовен и успешен.