Со потпишувањето на нов проект поддржан од НАТО, Центарот за управување со кризи (ЦУК) започнува процес на модернизација на националниот систем за справување со кризни и итни состојби.
Директорот на ЦУК, Мухамед Али, официјално го потпиша договорот за реализација на повеќегодишниот проект G10231 – „Интероперабилен систем за командување со инциденти управуван од вештачка интелигенција за прекуграничен одговор при кризни и итни состојби (NICS-2)“, кој се реализира во рамки на НАТО програмата „Наука за мир и безбедност“ (Science for Peace and Security – SPS).
Од ЦУК посочуваат дека по подолг период, за првпат започнува сериозен процес за изградба на современ и интегриран систем за управување со кризи во државата, со јасна визија и силна меѓународна поддршка.
Проектот претставува значајно признание за капацитетите и посветеноста на институцијата во областа на управувањето со кризи, а воедно е и важен чекор кон модернизација на системите за координација, рано предупредување и справување со природни непогоди и вонредни состојби.
Со имплементацијата на NICS-2 се очекува да се зајакне меѓуинституционалната соработка, да се унапредат капацитетите за донесување одлуки во реално време и да се создадат поефикасни механизми за заштита и безбедност на граѓаните.
Во рамки на проектот ќе се зајакне и меѓународната соработка, а предвидена е и поддршка за партнерите од Украина преку размена на знаења, искуства и добри практики во областа на управувањето со кризи и итни состојби.
