Данска го продолжи воениот рок од четири на 11 месеци

Данска го продолжи времетраењето на воениот рок од четири на 11 месеци, како дел од мерките за зајакнување на одбранбените капацитети во услови на зголемени безбедносни предизвици поради војната во Украина.

— реклама —

Според данските медиуми, околу 1.600 млади Данци вчера ја започнале воената служба според новата програма. Воениот рок во Данска и натаму главно се заснова на доброволно пријавување, а доколку нема доволно доброволци, преостанатите регрути се избираат по пат на жрепка.

— реклама —

Оваа година околу 20 проценти од новите регрути се жени. Од годинава задолжителната воена служба е проширена и на жените постари од 18 години, што претставува значајна промена во данскиот систем на одбрана.

Началникот на одбраната Михаел Хилдгард изјави дека воената служба им овозможува на младите да преземат одговорност и да придонесат не само за вооружените сили туку и за општеството во целина.

— реклама —

Меѓу регрутите што ја започнаа новата програма е и 19-годишната данска принцеза Изабела, најстарата ќерка на кралскиот пар. Таа во следните 11 месеци ќе служи во Гардискиот хусарски полк во касарната Антворсков, а според данските медиуми, доброволно се откажала од платата што ѝ следува за време на службата.

— реклама —

Нејзиниот брат, престолонаследникот Кристијан, претходно исто така го отслужи воениот рок и минатото лето започна обука за офицер. Учеството на членовите на данското кралско семејство во вооружените сили е долгогодишна традиција, присутна и во други европски монархии.