Ден Дончев првопријавен во нова полициска акција: Претреси во приватна болница, ФЗО и над 10 локации - има сомнежи за милионски злоупотреби

Поранешниот директор на Фондот за здравствено осигурување, Ден Дончев, е првопријавен во нов случај што го истражува Одделот за организиран криминал при Бирото за јавна безбедност, дознава „Скопје1“. Според неофицијалните информации, утрово се спроведуваат претреси на повеќе од десет локации во Скопје, Тетово и Куманово, во рамките на истрага за сомнителни финансиски трансакции и можни злоупотреби поврзани со приватна болница и Фондот за здравствено осигурување.

Меѓу лицата опфатени со полициските активности, според првичните информации, се поранешни директори, поранешен претседател на Управниот одбор на Фондот, поранешни раководители во оваа институција, како и сопственик на приватна болница.

— реклама —

Сомнежите се однесуваат на повеќе кривични дела, меѓу кои злоупотреба на службената положба и овластување, несовесно работење во службата, измама и перење пари.

— реклама —

Според неофицијалните сознанија, штетата врз буџетот надминува 1,5 милиони евра, додека противправно стекнатата имотна корист за приватната болница се проценува на околу четири милиони евра.

Во случајот, според истите информации, се опфатени и сомнежи за оштетување на поголем број пациенти кои се лекувале во болницата.

— реклама —

Полициските активности се во тек, а засега не се соопштени идентитетите на сите лица опфатени со постапката, ниту деталите за начинот на кој наводно биле извршени злоупотребите.

Се очекува Министерството за внатрешни работи во текот на денот да објави повеќе информации за акцијата, бројот на осомничени и кривичните дела што им се ставаат на товар.

Информациите за улогата на Дончев и останатите лица засега се неофицијални, а нивната евентуална кривична одговорност допрва треба да се утврдува во надлежна постапка.