Фиктивни фактури, двојна наплата и перење пари: Голема истрага за приватна болница и функционери на ФЗО

Осум лица се лишени од слобода во полициска акција спроведена во Скопје, Тетово и Куманово, во рамките на истрага за сомнежи за незаконско наплаќање операции на очи. МВР поднесе кривична пријава против 11 физички лица и една приватна здравствена установа, меѓу кои и поранешни и актуелни функционери на Фондот за здравствено осигурување.

— реклама —

Акцијата била спроведена денеска, 29 октомври, од Одделот за сузбивање на организиран и сериозен криминал, во координација со Обвинителството за гонење организиран криминал и корупција. При претресите, извршени со судски наредби, биле пронајдени и одземени околу 50.000 евра и мобилни телефони.

Според кривичната пријава, во 2020 година двајца тогашни директори на Фондот за здравствено осигурување, заедно со претставник на приватната здравствена установа, склучиле договор спротивно на пропишаните постапки и интерните акти на Фондот. Се сомничи и дека претседателот на Управниот одбор направил неправилности при одобрувањето на договорот.

— реклама —

Истрагата упатува на сомнежи дека установата преку внесување невистинити податоци во електронскиот систем на Фондот и изготвување фактури со невистинита содржина наплаќала исти услуги и од Фондот и од пациентите. На пациентите, покрај законската партиципација, им била наплаќана и приватна цена за операциите, без да им биде соопштено дека услугите биле наплатени и од Фондот.

— реклама —

Пријавениот директор на Секторот за контрола се сомничи дека не ги доставувал извештаите за утврдените неправилности до надлежната комисија и го одложувал спроведувањето на редовни контроли. Две раководителки на подрачната служба во Скопје, пак, се сомничат дека не ја следеле наплатата на изречените казни и не ги известувале надлежните служби, поради што исплатите кон установата продолжувале.

Според МВР, штетата на буџетот на Фондот за здравствено осигурување изнесува 104.818.754 денари, односно околу 1,7 милиони евра, поради исплати врз основа на фиктивни фактури, како и дополнителни 525.000 денари за ненаплатени договорни казни. Во периодот од 2022 до 2025 година, установата наводно се стекнала со противправна имотна корист од 261.271.961 денар, односно околу 4,25 милиони евра.

Според пријавата, со двојната наплата биле оштетени меѓу 3.000 и 4.000 пациенти. Пријавените се товарат за различни кривични дела, меѓу кои злоупотреба на службената положба и овластување, несовесно работење во службата, фалсификување деловни книги, измама во службата и перење пари.